Қазақстандықтар өз өмірінің сапасын оң бағалайды
Жалпыұлттық сауалнамаға қатысушылардың 95,2%-ы өз өмірін оң бағалайды, 78,6%-ы бір жылдан кейін жақсы өмір сүреміз деп күтеді.
DATAmetrics халықтың әлеуметтік көңіл-күйі туралы әлеуметтанулық деректерді жариялайды: өз өмірін бағалау, отбасының материалдық жағдайының өзгеруі және болашақтан күтетіні. Зерттеу 2026 жылғы 13 маусым мен 2 шілде аралығында ҚР Президенті жанындағы Қазақстан стратегиялық зерттеулер институтының тапсырысы бойынша жүргізілді.
Жеке сұхбат (face-to-face) әдісімен өткен сауалнамаға Қазақстанның барлық өңірлерінен, сондай-ақ Астана, Алматы және Шымкент қалаларынан 18 жастан асқан 8 000 тұрғын қатысты.
Өмірге қанағаттану
Ең жоғары бағалар өмірге қанағаттану көрсеткіші бойынша алынды. Қатысушылардың 63,3%-ы өз өміріне толық қанағаттанады, тағы 31,9%-ы қанағаттанатын сияқты. Осылайша, респонденттердің 95,2%-ы өз өмірін оң бағалайды. 3,4%-ы қанағаттанбайтын сияқты, 1,1%-ы мүлдем қанағаттанбайды.
Отбасының материалдық жағдайы
Қатысушылардың үштен екісінен астамы (67,6%) соңғы бір жылда отбасының материалдық жағдайы жақсарғанын айтты: 29,8%-ы нақты жақсарды деп санайды, тағы 37,8%-ы оң өзгерістерді атап өтеді. 25,5%-ында жағдай өзгермеген, 6,6%-ында нашарлаған.
Болашақтан күтетіні
Респонденттердің онның сегізіне жуығы (78,6%) бір жылдан кейін бүгінгіден жақсы өмір сүреміз деп есептейді: 45,0%-ы айтарлықтай жақсаруды, 33,6%-ы біршама жақсаруды күтеді. Тағы 15,9%-ы отбасының тұрмыс деңгейі өзгермейді деп санайды, 3,4%-ы нашарлауды күтеді.
Жалпы алғанда, нәтижелер әлеуметтік көңіл-күйдің негізгі көрсеткіштері бойынша оң бағалардың басым екенін көрсетеді.
Іріктеме Қазақстан Республикасы бас жиынтығының негізгі әлеуметтік-демографиялық параметрлері, соның ішінде елді мекен түрі (қала/ауыл), жынысы мен жасы бойынша репрезентативті. 95% сенімділік ықтималдығы кезінде іріктеменің статистикалық қателігі ±1,1%-дан аспайды.
DATAmetrics деректерді ОСК 2026 жылғы 3 шілдедегі №ОСК-11-07/ЗТ-К-29 жазбаша хабарламасымен жариялайды.